Brisani prostor

 

Iz rukopisa zbirke kajkavske poezije 'Bu do kaj' autora Nenada Piskača, hrvatskog branitelja i novinara, čiji se izlazak očekuje 2012. godine u splitskoj Nakladi Bošković, donosimo nekoliko strofa kajkavske poezije primjerenih aktualnom političkom trenutku u Hrvatskoj.(mmb)

 

 

Testamentum Croatušima z Bruxellesa zlifran

vu tri čina spelan

Čin pervi

Pred referendumuša Unijatuš šči po Croatušu

alo

Croatuš

ideme red po red

jadaj se jadaj, litanije nabrajaj

nadaj se nadaj, papu dozevaj

potiho tak da čuti te ni

očenaše nabrajaj

moliti se smeš ajngelušu

za čiju god očeš dušu

od ve za sagda

zapamti

piše f preambulušu

se tvoje naše je - naše tvoje ni nič

paragrafa posluhni da ne delal bič

kam z prstom pokažemo

čkomečki sedi

škerlak z glave doli i oči v pod vupri

brege bumo konfescerali

dvorce zeli, gorice porezali, najža spraznili

pelnice zaprli, poreza odredili

vodu kaj piješ, zrak kaj vdišeš naši su takaj

znaš zabadava ni niš

čkomiš i platiš

razmeš

decu bumo preškolali, zemlu zadračili

morje bumo si, razme se, zeli

ne odma nek pomale

jezik horvatski

zatreli

Croatuš, kaj se bojiš

vino nemo zlejali – mi ga bume spili

živeli

da ne zabiš

našpičenom poveč sakom svojem možu

vu akcijske plan zbogom oružju

idu vile, sekire, roglje

se navči se

pri nas se gubčiti, francekuvati i gotovinati ni smeti

ni protiv paragrafuša naših jambrati

se znamo, se vidime

ti niš ne vidiš i nemaš znati kaj

Croatuš

tak

došel buš v zemalski raj

mamica su pri nas tatek, tatek je mamek

dečeci moreju pucke postati

po cesti ni smeti srati ni mujceka krivo pogledati

pelame po desnoj strani vulice

v Britanije po levoj

piti ni smeti, da te ne prevagne zavoj

duhana sadimo ampak pušiti ne damo

Croatuš

kaj se švicaš, pobeči nemreš

viš

Evropa na gubcu ima zlatnu brnjicu

ne pitaj zakaj

mam te izoleramo od sega sveta i nebeskih satelita

in perpetuum

vekšeši jiju mejnšeše

naš ti tat mora biti drajšeši nek rođeni brat

 

Čin drugi

Hištorijski identitetuš Croatuša nazu vu pervi plan postavlen

 

alo, unijatuški Evropuš, ti veli malički Croatuš

primil na znanje jesem tvoj testamentum

pragrafuše prečital i preambuluša

razmel jesem se baš se

zato velim ti - kruha z vaše mele ne

ni ne bu na zemli ni na nebu

vaše pravde sem sit

znate kaj?

prosim

ote si skup lepo v rit

pri nas

ne zamerite

tatek je tatek, tat je tat

mamek je mamek, brat je brat

dečec je odnavek dečec, pucka zanavek pucka

gdo v tuđe dvorišče zajde puštamo cucka

tak je bilo, tak je ve i tak bu ostalo

naše je naše, dosta če je i malo

je, nas se odnavek kralo

Talijanuš, Turak, Nemac

Mađar

Serb

velka fala i za vašu skerb

unijatuški Evropuš

nemreme znati do gda bumo vu ove stvari kuš

stepli sme z rekleca do ve saku stranjsku vuš

navčili se jesme zapamtili nisme

gledeti f kmici, čkominu kak preseči

drete z jarma na pleči zvleči

ak

niste znali

moremo vam po jasnoči reči

pred kim Croatuš jedino kleči

 

Čin treti

Unijatuški arbitražni sod nad sodima kaj presodil Croatušima je

Preambuluš velikega arbitražnega soda nad sodima

vu ime

copernice Unijatušice

sina unijatuškega Evropuša

zvezdanega duha z Pandorine škatule

ovo je slovo nad slovami

rieč nad riečima

Crotušima

svima

 

Paragraf pervi

 

gdo paragrafuše ne poštiva – skuriti ga živa

gdo po preambulušu ne dela – proč desna roka cela

gdo testamentuma ne obderžava – nek mu prokleta bu deržava

gdo protiv vole je naše – deti ga na hude muke

gdo jambra – zeti mu kruh z roke

gdo prek mere dece ima

jajca odrezati

svima

 

Paragraf drugi

gdo dečecu ne da da pucka postane

ima se rascepati i raznesti na sve četiri strane

gdo pucki ne da dečec da bu

živa ga zakopati v grobu

gdo tatu reče da je tat – da mu poreznik ne da spat

gdo pederu reče peder – čez rit i gobec nabiti mu feder

gdo pravdu išče – da mu se zeme dvorišče

gdo po istini govori – da mu hiža v ognju zgori

gdo nemre čkometi – bole mu je sam hmreti

gdo Croatiju zdiže – rod zatreti do trećega kolena

slobodno i niže

gdo nekaj oče znati – napol ga prežagati

gdo ne kleči pred sodom vu Haagu

bez bubregof da se hiti v grabu

gdo paragrafuš ov čuti neče

dozvoleno ga četnik na ražnju speče

Završna rieč po paragrafu drugom

aletrnativuš proti paragrafuša drugoga ni dozvolen

gdo bi pak takvu reč iskal

treba delati ovak

pervo ga locerati, onda identificerati

gda loceran i identificeran je

alternativuški element

zalisičiti treba

pak

rovne vu naš sod nad sodima zlifrati

da mu se na ime, rieč i čast

moremo poscat

 

Paragraf treti

na našoj su košti

croatušoevropuši

verni testamentumu našem

da im ne zmanjka f taški

zaslužniki

plaču primiti trebaju

prek verha napuniti im kopanju

o

mastiguzi

porinuti im f pekmez saki perst

judašima sake fele, poltronušima sih verst

obderžavatelima testamentuma ne šparati euruša

tužitelima penez stresti kuliko išču da išču

socima vreče našopati

škatoflin podeblati

kervnikima kervi croatuške piti dati

dok se ne zrigaju

nema cene

za se ono kaj delaju i na našu stran mečeju

tak

po zaslugami delati se ima

de god bili na znanje

Croatušima

Nenad Piskač "Bu do kaj"