MOKA, SMERT I VUSKERS PO SAFSKOJ 66 A. D. 2015.

(vuskersna čestitka brez pofarbaneh jajci i bedasteh zajci zi Safske zlifrana pak čez tri čina na paper vu vuskersnicu spelana za mir Croatušof nakanjena)

1.
MOKA

Saku večer na zadnje sme večeri
Nami celi žitek velki je petek
Kervarime potiho, male pomale
Popluvani, zjudani, bez rieči fale

Za stolom f Safskoj same golgote
Oči z križa v nebe vuperte
O spokoja! Poklam boja zdihavle soldat
Na kolena! Poklam boja hičen je Horvat

Horvat Horvatu farizejuš je najhujši
Horvatu Horvat krivosudec je najbolši
Horvat Horvatu križ je najžmekši
Horvatu Horvat Juda je najvekši

2.
SMERT

Kašne hude laži človek dura
Jezuša da zela je smertna vura
Još zazivlete Božju pravicu – kuš
Se vas treba deti na križ - mrš

Ščera večera, denes križ, zutra smert
Od Pilatuša do Safske kmica seposud
Černa graba vu opravi beloj
Gizdava špancera po Kroaciji celoj

Kervava moka, čerlena hiža
Pobeči ni moči spodi križa
Kak ni človek od smerti
Horvat Horvatu nemre vujti

3.
VUSKERS

Vuskersnul je zvuna i znotra
Vuskersnul je za denes i zutra
Vuskersnul je za zakopane žive
Vuskersnul je f Safskoj tu i ve

Kaj iščete onega šteri je bil tu
Onega šterega ni več v grobu
Kaj iščete živega med mertvima
Ma, iščeme Horvata med Horvatima

Kaj nebe i zemlu gerli i Jezušu ide
Kaj človeka v grob ne tira
Na Vuskers čudo nek dojde
Da Horvat Horvatu dal bu mira
Nenad Piskač