Drago Gervais

(1904. – 1957.)

 

MOJA ZEMJA

Pod Ûčkun kȕćice
bȇle.
mîće, kot sȕzice
vȅle.

Bȇli zidȉći, črjȅni krovȉći
na kéh vrapčȉći
kantȃju,
mȋći dolčȉći, još mȁnje lešȉce
na keh ženȉce
kopȃju.

Cȅstice bȇle, tȃnki putȉći
po kéh se vozȉći
pejȃju,
i jedná mȋća, uska rečȉca,
pul ké se dečȉca
igrȃju.

Na sȗnce se kȕćice
grȋju,
na tȗrne ȕrice
bîju.

 

MAGLICA

Jȕtro j' rȁno, još va dȏlceh
črna nȏć leží.
Po ravnȉce, kraj vodȉce,
maglȉca beží.

Po ravnȉce, kraj vodȉce,
hodi mlȃd pastîr,
mȑzlo mu je, v rȗki pȗše,
svȗda j' tihi mîr.

Zȁ njin bȇle ȏvci hȍde,
zvončȉći zvoné,
i pomȁlo, kako sȅni,
va maglȕ roné.

 

LEPA JELE

Ni bîlo takȍve
rȏžice bȇle
kakȍva bilȁ je
Tȏnkina Jȇle.
Složȉli se sví,
da lȅpše već ní.

Su naši fantȉni
za njun ponemȅli,
i svi bi ju bîli
ženȉt otȅli.
A mȃla na čȕde
čigȍva da bȗde.

Pa z ȍči prevrȃće
kako svetȉca,
šegȁva je mȃla
kȁko lisȉca:
pogȁču bi tȅli
a mrvice dȇli.

I su se fantȉni
skonfužijonȁli
i puno se pȗti
rad nje zbarūfȁli,
po staroj užȃnce
pul Gȕća na tȃnce.

Ma onput prišȃl je
z Mȅriki Frȁnić,
ter sȅmo, pa tȁmo,
i zȇl ju je vrȃnić.
Se j' zajūbȉla
i oženȉla.

 

BURIN

A danȁs po mȏre jȕnak mlȃdi jȁši,
to burîn ledeni po Kvarnȇre prȃši,
i konjȉć se pȅni, od vesȇlja rže,
pa letí po mȏre i od strȇli brže.

Sȁbjun jȕnak maše, ȍblak crni tȉra,
po valȉćeh mîćeh mu konjȉć prebȉra;
ȏnput sȍpet skȃče i letí kot strȇla,
vas Kvarnȇr danȁs je jedná pȅna bȇla.

Jedná pȅna bȇla i vesȇlje vȅlo,
kad je nȅbo čȉsto kȁko žȇnsko tȇlo
i kot sȁnja lȇpo, mȏre pȍlje mȍdro

po ken vȅtrić skâče vȅselo i bȍdro.
Još gȁlebi jȁto nad valȉćeh krȗži,
pȁdaju na môre kȁko bȇle rȕži.

 

JUGO

Jȕgo po Kvarnȇre brȇg za brȇgon vȃja
hȉta ga na grȍti, nȁzada prihȃja,
kȁko div se pȅni; sve va jȃde vȅlen
vȃjaju se brȇgi po Kvarnȇre cȇlen.

Kȁko mrȃki crni ki v sebȅ smrt nȍse,
sȗžnji va verȉgah ki za mȉlost prȍse,
i kjanȗ, i mȍle, i kričé, i plȃču…
v jȕge po Kvarnȇre crne sȅni skaču.

Sȗžnji va verȉgah ča j' ih more zȇlo,
galeȍti to su, more grȍbje vȅlo,
va ken kȍsti njȉhe rȉban mȍrsken svȇte.

To su galeȍti ča danas se prȇte,
i kjanȗ, i mȍle, i kričé, i plâču,
to su sȅni njȉhe ke danȁska plâču.

 

NONIĆ

Kad san još mȋći bîl
s nȏnićen san na ribi hodîl.
Okol četȑte bimo se stȁli
i sve do pišmȏj veslȁli,
barku sūrgȁli,
povrazi v more kālȁli,
sēdeli,
mūčȁli,
al ćakulȁli.
Kad bin kakȍvu ribu ćapȃl
i nȏnić bi s mȁnun uživȃl,
i rȅkal, da pasja ta nȍga,
ćapá na mojga boga
već i pišmȍja…
Mirno bi bilo ȏkole nas,
more bi se lēskȁlo,
na tihen vetre zibȁlo
i neš šapīćȁlo.
Pod jȕtro bi s kraja kosȉći fikȁli,
se dozīvȁli…
Sunce bi s brega shajȁlo,
pomȁlo,
kot da je j' strȃh
na jedan mȃh…

Ma jedno jutro, kad bilo se j' stȁt,
ni bilo nȏnića vnuka zvat:
po kuće su jȗdi na pȑsteh hodȉli,
nonu mirȉli,
boga molȉli,
i žȗti lumîni palȉli.

 

PUL OGNJIŠĆA

Žvȃnka s črjȅnemi vlȃsi vinȍ je s konȍbi nosȉla,
i va bukālȅtu točȉla.
Z rukȉ v' rȗku je bukālȅta hodȉla.

Na ognjȉšće j' ogȃnj gorȇl,
na škȃnjice j' nȏnić sedȇl
i svi mi rȇdon:
Tȏne, Rȗde, Frȃne
i vȅseli Žvȃne.
I svaki je neš imȇl povēdȁt
i svaki je kȗ tu imȇl špjēgȁt.
Samo je nȏnić klimal
i pomȁlo umȉral.

A vanȅ j' tramuntȃna kantȁla
i sve odnašȁla…

Smo onput dȍma, pul ognjȉšća sedȅli.
Ma j' tramuntȃna jača bilȁ,
po celen je svȇte nas razneslȁ,
i sad smo nesrȅćni i sȃmi.
Vȁveki vȇkon sami.

Ustȁla je doma samo Žvȃnka s črjȅnimi vlȃsi
ka pazi da se ogȃnj posȅnsega ne pogȃsi.

 

BARKE FAREN

Va bȃrke je nȏnić stȃri stâl,
na Slȁtine, vȃnka s Portȉća,
peršȏna nevȏjna i mîća,
i furȅšton na kraje kričȃl:
pite šen barke faren.

Pite šen barke faren.
A bȃrka je svȏjni nȃv bilȁ,
ponosȉt je po mȏreh sveh plaval,
drugȃčja mu je mladost bilȁ,
i nȏnić bi najraje plakal.

Pite šen barke faren.
Selo je bilo va stareh dni,
kadȅ su sad vȅli palȁci,
nî već selȁ, ni jȗdi već nî,
na kraje se šeću pajȁci.

Bi nȃjraje nȏnić beštimȃl,
tel sve z rukún mornȃrskun zdrobȉt,
pa bi ga i jȃd i srȃn pasȃl,
ma mora i ki fjorîn dobȉt:
pite šen barke faren.

 

STARI ZAKON

A ča nan korȉsti plȁkat,
ter znȃmo stari zakȏn
da je nad kmȅton parȏn.
To su nas vȁdili ćȁća,
to nas je vȁdila mat,
a va nedȇjni dan
i gospodîn plovȃn:
— Trpȉ, mučȉ i breme nosȉ,
za drugega delaj, svojȅ prosȉ.
Blažȅni strpjȅni, magȃr njin je teško,
zač njin pripȁda krajȅstvo nebȅsko.

Ke lȇpe besȅdi,
i sve su na mȅste,
ma mî smo na cȅste.

 

KMET SE JE STAL

Prišȃl je glȃs,
velȉk i svȇt:
— Stȁni se, kmȅt,
sadȁ je čas!
Prišȃl je glȃs,
i kako strȇl
zemjȕ preletȇl,

I pokle stȍtine let
sȍpet se dȉgal je kmȅt:
za zemjȕ i pravȉcu,
za svoju starînu,
za svoju dečȉcu
i za domovȉnu:
I kadȅ mu j' nogȁ hōdȉla
sve je zdrōbȉla,
i kadȅ je pesnȉca udrȉla
niš ni pustȉla.

A zȁjedno s njin su sȅni hodȉle,
milijȗni sȅni njigȍveh stȃreh,
ki su ovdȅ živȅli,
se mȕčili i trpȅli,
zemjȕ kȍpȁli,
s krvȗn natapȁli,
i robovȁli.

Svu je zemjȕ pasȃl,
a ȏnput velȉk i jȃk,
ponosȉt je na Učke stȃl.
I glas je njegov zagrmȇl:
— Ja, istrijȃnski kmet,
svojȕ zemjȕ san zȇl,
i joh onemȕ,
ki sȍpet bi zȇt mi ju tȇl.

 

(IZABRANA DJELA / PAVIĆ, BALOTA, LJUBIĆ, GERVAIS; priredio Marin Franičević; Pet stoljeća hrvatske književnosti; knj. 105, Matica hrvatska: ZORA, Zagreb, 1973.)

 

Pet, 14-06-2024, 13:43:20

Potpora

Svoju članarinu ili potporu za Portal HKV-a
možete uplatiti i skeniranjem koda.

Otvorite svoje mobilno bankarstvo i skenirajte kod. Unesite željeni novčani iznos. U opisu plaćanja navedite je li riječ o članarini ili donaciji za Portal HKV-a.

barkod hkv

Komentirajte

Zadnji komentari

Telefon

Radi dogovora o prilozima, Portal je moguće kontaktirati putem Davora Dijanovića, radnim danom od 17 do 19 sati na broj +385-95-909-7746.

AKT

Poveznice

Snalaženje

Kako se snaći?Svi članci na Portalu su smješteni ovisno o sadržaju po rubrikama. Njima se pristupa preko glavnoga izbornika na vrhu stranice. Ako se članci ne mogu tako naći, i tekst i slike na Portalu mogu se pretraživati i preko Googlea uz upit (upit treba upisati bez navodnika): „traženi_pojam site:hkv.hr".

Administriranje

Pretraži hkv.hr

Kontakti

KONTAKTI

Telefon

Telefon Tajništva
+385 (0)91/728-7044

Elektronička pošta Tajništva
Elektronička pošta Tajništva
Ova e-mail adresa je zaštićena od spambota. Potrebno je omogućiti JavaScript da je vidite.

 

Elektronička pošta UredništvaElektronička pošta Uredništva
Ova e-mail adresa je zaštićena od spambota. Potrebno je omogućiti JavaScript da je vidite.

Copyright © 2024 Portal Hrvatskoga kulturnog vijeća. Svi sadržaji na ovom Portalu mogu se slobodno preuzeti uz navođenje autora i izvora,
gdje je izvor ujedno formatiran i kao poveznica na izvorni članak na www.hkv.hr.
Joomla! je slobodan softver objavljen pod GNU Općom javnom licencom.

Naš portal rabi kolačiće radi funkcionalnosti i integracije s vanjskim sadržajima. Nastavljajući samo pristajete na tehnologiju kolačića, ali ne i na razmjenu osobnih podataka.