Božo Hlastec

(1923. – 1994.)

STARI POT

Tem su potem deda hodil.
Japa moj je na njem zginol
I mene je po njem vodil,
Nit ja nisem šiju zvinol.
Te stari pot, je pot krvavi.
To pot je sozi i kaštige,
On je težek ali provi
Pun je toge pun je brige.
Fnogi su na njem nestali,
Zdignjene visoko glove,
Na tem poto ludi mali,
Rodili su lude prave.
Po tem poto denes hodim,
Ak već čisto roven neje,
Tot si svoje dete vodim,
Stari pot još srce greje.

(kaštiga – bol)

KAJ STE ŽALOSNE ROŽE

Kaj ste denes tak žalosne
Vi rože črlene.
Kaj ste denes tak čkomeče
Vi šume zelene.

Kaj vas tišče, kaj boli,
Nekaj praf vam néje,
Denes isto kak i v čera
Drago sonce gréje.

Čmele koli vas oblečo
Se se živo giba,
Veter stiha se zaleče
Pak vas milo ziba.

Najte zato tožne biti.
Živlenje je i tak kratko,
Ne se treba žalostiti
Či kaj nejde glatko.

NA POLU

Nedela je. Jutro rano.
Sonce se zlato budi.
Z vetrom čes pole pospano,
Idem i to mi godi.

Žita se šmajhlam žota
I skorom je bilo mi žal,
Črlene make kraj pota
nabrati, al bom ih nabral.

Na polo sem ostal sam
Z pušlecom krvavih maki
Z njimi i srce ti dam,
To rekel cvet bi ti saki.

Kak zlato v soncu blešći
To morje zreloga žita
Na sakom vetru dršći
Kak lubav, kaj v srcu je skrita.

(šmajhlati – dragati)

KLOPOTEC

Fčera so mejaš
Klopotec v trsje deli.
Celi dan so slagali,
špotali i kleli.

Dog ga je zgotovil,
Već se noć spostila.
Lepo je klepetal,
milina je bila.

To noč je veter puhal.
Ja sem v kleti spal.
Klopotec je popeval,
Pred jutro je stal.

Bez bati je bogec ostal,
Se su mu se razleteli.
Mesto njih na klepetači
Tri škovrca so sedeli.

BABICA

Celo noč je veter cvilil,
Tokel s potni vrati,
Babica so v jutro rekli
Nesem mogla spati.

Išla sam zasunut vrata,
Da se deca ne zbudijo,
Vreme se bo spremenilo,
Se kosti me bolijo.

Devedeset let je prešla,
Naruzlano lice drago,
Za sakoga je znala najti
Dobar nauk i reč blago.

A te oči njene črne,
Znale so se iskrit v sreči,
Dog sam sedel ji vu krilu
I poslušal drage reči.

Ve je več odavna nema
V rodnoj grudi spi, — počiva,
O!... Kak bi srečen bil
Da je znami, srečna, — živa.

VRANE

Kvar, kvar. —
Z vetrom letijo
Po zraku kričijo
Kvar, kvar.

Zima se vleče,
Sever okreče,
To vrane velijo
Ke žnim letijo.

Tu su i čavke
Prave brblavke.
Vu istem jati
Vražji su svati.

Dok sneg perhneče,
Gori po seče
Vrane sedijo,
Gladne drmijo.

Po dvori skačo,
Da da zakvarčo.
Na snegu sedijo.
Tožno zgledijo,
Kvar, kvar.

HIŽICA VU SNEGU

Hižice male, kaj ste se stisle,
Ve ste još menše, nego ste bile
Z belim plaščem ste prekrile krohe
Još ste mi drajše, — hižice mile.

Sneg se na vašem krohu otapa.
Na najži se šunke sušijo.
Čez obloček se kakti s pekla kadi,
Po kapčini ledene sveče visijo.

Huda je zima, cifrasti su glajži,
Samo se gde gde vidi nosek mali,
Kak huče, vu zmržnjenu paru i luče
Na pot, kak negde i mi smo lukati znali.

(najža – tavan, glajš – staklo)

SIGDI TE VIDIM

Sigdi si, vu rosi dragog cvetja
Kojega si navek rada brala,
Dog k sebi si tak milo me zvala
V sreči tihi našeg protuletja.

V noči te vidim, — na mesečini beli,
V mlademu svetlu mesečevog traka
I v glibini najdeblešeg mraka,
Sikot moje oko te gledi.

I dok oči zapro se pospane,
Srce moje ke sebi te doziva,
Slika tvoja pred mene se stane.

Ti si z menom draga, ista živa,
Pak mi tiho šapčeš drage reči,
O kak sem srečen, ne moči zreči.

ZDRAVICA

Rudi Raku

Ja zdižem kupicu i velim.
Si dragi mejaši i pajdaši,
Kej ste tu pri stolu, — želim,
Da z vami mi srce se raši.

Da pod ovim krohom kleti,
Navek lubav cveta bratska,
Nek nam navek kak luč sveti,
Ta draga naša reč Hrvatska.

Da se stare ne pozabe šege.
Da popevke nam domače,
Čez se dole lete brege
Da se bratska lubav stače.

Da se barem jedna spije,
I spomene na pajdaše,
Čije srce v grobu gnije,
Za njih, — zveličenje naše.

(šega – običaj)

HRVATSKOJ

Se žalosti i toge tvoje,
Se čemari, — tve kaštige,
Se so to i toge moje,
I tvoje so moje brige.

Za tebe bi se ja dal,
Vez bi čemer tvoj ja popil,
Moku bi ti z lica spral,
Sozom bi ti tugu topil.

Z prsi bi ti krv obrisal,
Z rožam bi te so zasadil,
Pa bi celom svetu pisal
Da sem s srca trn ti zvadil.

(STARI POTI, Božo Hlastec; Kajkavsko spravišče, Mala biblioteka „Ignac Kristijanović“, Posebno izdanje časopisa „Kaj“, Zagreb, 1970.)